Firefox 3 (alpha 5) vén con soporte SQLite para almacén fora de liña (offline storage). As últimas tendencias en aplicacións web veñen da man de Google e o seu novo proxecto Google Gears. A partires de agora van comezar aparecer as aplicacións web fora de liña, co cal poderemos traballar nunha aplicación web sen precisar estar conectados e unha vez esteamos en liña sincronizar os nosos datos co servidor.

Gran Paradiso Alpha 5 é a última versión que está dispoñible para probas que está baseado no motor Gecko 1.9. Esta versión incorpora novas características de cara a obter unha mellora na experiencia do usuario, entre elas melloras de cara ao soporte offline. Dende a web de Mozilla non se recomenda o uso deste navegador xa que está orientado para as probas de desenvolvedores de aplicacións web.

Analizando as liñas de traballo do navegador Firefox 3 pódese observar que as novas características que incorpora van nesa liña:

• Marcado de recursos para traballar offline
• Soporte para eventos en liña e fora de liña
• Novo interface nsIIdleService para controlar o tempo que está “ocioso” o usuario
• Soporte para PNGs animados
• Soporte experimental do atributo ping nas ligazóns (<a ping=”uri”>)
• Melloras en Place (novo sistema de historial e marcapáxinas).

Máis información na web de desenvolvedores de Mozilla (MDC).

O desenvolvemento web parece que inda ten carrete para largo, e todo grazas o Software Libre e a comunidade (en especial a Mozilla e Google neste caso).