O grupo de desenvolvemento de Adium , o popular cliente de mensaxería instantánea para Mac OS X, anunciou este domingo no seu blog que a próxima versión 2.0 soportará transmisión de son e vídeo.

Os desenvolvedores manifestaron que, dende o mes de xullo, están a investir un esforzo titánico para acadalo pero todavía non se atreven a dar unha data aproximada de saída da nova versión de Adium. O que si nos ofrecen no seu blog, é un resumo do estado do desenvolvemento ata o de agora e unhas poucas capturas de imaxe da versión de desenvolvemento actual da aplicación. 

Para moitos (entre os que me atopo), Adium é o cliente de mensaxería instantánea por excelencia para Mac OS X, sendo software 100% libre (licenza GNU/GPL). Adium combina a flexibilidade de poder conectar á meirande parte dos servidores soportando case tódolos protocolos dispoñibles e unha interface sinxela, moi personalizable e dunha aparencia extraordinaria. Ademais, aproveita os servizos de Mac OS X como o corrector ortográfico integrado ou o intérprete de voz para os avisos, podendo empregar tamén o fabuloso sistema de notificacións Growl (licencia BSD).

Por se esto fose pouco, o sitio web de Adium dispón dunha grandísima sección de engadidos e extras catalogados que completan aínda máis, se cabe, este fantástico programa.